Gajica Terezuljin

 Gajica Terezuljin

 

 

Totu j mestišće Gajici Terezuljinu

tuka počiva pod domaćun rijušun

ka mu j lahka i mehka

 

Za žitka svoga služil je puno gospodari

i va Teloj i va Gornjoj Meriki

služil vridno i pošteno

ma nij otel počivat va tujini

va tujemu jilu

i sad domaka svoj na svojemu leži

va hrambišću med svojimi

 

 

Manje poznate riječi:

 

rijuša – zemlja crvenkaste boje,

Tepla Merika – Južna Amerika,

Gornja (ili Mrzla) Merika – sjevernoamerički kontinent,

jilo – ilovača,

hrambišće – mjesto pohrane.

 

 

Hćer Jivine Tildina

 Hćer Jivine Tildina

 

Piše se Blazina

Mesto Blažina

I ne zna

Ča to znači

Biva va Meriki

Va Indijani

Se poli  nje

Se vrti va krugu

Geri Ćikago Džolijet

Piknik banka hamburegre

Ne zna kadi j

Hrvacka

A kamo Podjamina

Kadi j njeji otac

Na paši bival

Škrebut pušil

I na njarotu igral

Ne zna ni kadi su

Zakuti

A tamo j Tilda

Njeja stara mat

Sirota bola i gosa

Smržnjivala

Šušanj i podlesnicu

Pobirajuć

 

Manje poznate riječi:

 

piše se – preziva se,

biva – živi,

Podjamina i Zakuti – toponimi za lokalitete u okolici Zlobina,

njaro – igra lovice na deblima drveća,

stara mat – baka,

šušanj – suho lišće koje se koristi za stelju,

podlesnica – tvrda trava širih listova, raste na rubovima šume, a dugo se zadržava zelena pa se može žeti i u kasnu jesen.

 

 

 

 

 

 

 

 

 

 

 

 

 

 

 

 

 

Smrt va tujici

 Smrt va tujici

 

 

Žitak kratak, smrt stalna,

A nikogar za važgat sviću neće bit,

Ni za mrtvo telo poškropit.

Nikogar njanci ni na čuvariji,

Ni za dušicu pomolit neće bit.

Nigdi nikogar za zvun zvonit,

Ni va lahku ga zemljicu sprogodit.

 

 

 

Manje poznate riječi:

 

žitak – život,

važgat – upaliti,

njanci – niti,

čuvarija – običaj okupljanja rodbine, susjeda i sumještana u kući gdje prije pokopa na odru leži mrtvac.

 

 

 

 

 

 

 

 

Sin sirotican z drugoga svita

 Sin sirotican z drugoga svita

 

 

Ovdika niste jimeli nikoga svoga

Se su vas zabili kod ča su i Boga

A tamo nij ni tužice

Ni brižice

Krov van ne pušća

A pod ne propušća

Niš vas ne stišće

Črna zemljica ne pritišće

Ni domaća ni tujica

Za sin je na miru saka dušica

 

 

 

 

 

 

 

 

 

 

 

 

 

 

Otac

 Otac

 

Vakalj

Voz

Kunj

Pašinac

Klahtar

 

Čokanjić

Kvartin

Dupljak

Zakopan

Prekopan

 

 

Manje poznate riječi:

 

vakalj – otkos,

voz – natovarena zaprežna kola,

kunj – konj,

klahtar – hvat drva,

čokanjić – boca piramidalna oblika,

kvartin – boca od četvrt litre,

dupljak – dvolitrena boca,

zakopan – ukopan, pokopan.

 

 

Mat

 Mat

 

Kofa

Plašćanica

 

     Mašuna

     Trajba

 

Škrb

Pojid

 

     Siknja

     Košnja

 

Lojenica

Finjenica

 

Manje poznate riječi:

 

kofa – pleteni koš koji se nosi uprćen na leđima;

plašćanica – platena vrpca dužine 2-3 metra, širine 3-4cm, kojom se veže breme na leđa i prenosi uskim stazama primorskog krša;

mašuna – lijeha omeđena gromačom;

trajba – krdo stoke koje se goni na pašu;

pojid – velika briga;

siknja – sječa drva;

lojenica – svijeća izrađena od loja;

finjenica – konac, završetak-

Pastorala

 Pastorala

 

 

nigdi i sad va svemirskih dumbljinah

živi se žitak kakov je i ovdika bil

nigda kad je našin svitu bilo reda

kad je sako čeljadino pozdravljalo

z faljenisus

kad su travu z kosun kosci kosili

va vaklji jedan za drugin

žene i muže se odbavljali va senar

za prve noći a budili jih petehi

zagrljene prvo zornic

kad su krave va letnje večeri

nadulih vimen od otave

mlade pastirice vrnjivale z pojila

nigdi i sad va svemirskih višinah

živi se takov žitak

onakov kakov je nigda i ovdi bil

 

 

Manje poznate riječi:

 

nigdi – negdje;

dumbljina – dubina;

žitak – život;

nigda – nekada;

vakalj – otkos;

senar – sjenik;

prva noć – rani mrak, sumrak, predvečerje;

nadulih – nadutih;

vrnjivat – vraćati.

 

 

 

 

 

 

 

 

 

 

 

 

 

 

 

 

 

 

 

 

https://radovantadejblogcakavskogpjesnika.blogspot.com/