Je to rič

 Je to rič

 

 

Ljelje ča j to napisal

Ma će ga dobit

Vrag će ga poškropit

Ov lih ću ga na kvačak spištat

Ucvirak od njega neće ustat

 

Njoči njoči sogane

Va koga si se takov hitil

Ocu ti se j se baštalo

A ti fićfiriću samo škrbećeš i kljepećeš

Prkećeš i slova prehićivaš

 

Trhljinavče trhljinavi črniš i finjivaš vas svit

Šmrgu baren divani kako triba

Pocurančino od cura si mokroticun mokar

Spod nosa ti sesmirun kiri slina

A utvaraš si da si Bog zna ča

 

Kukavico kukavče fuljetačo ropoćino

Odi odi smirun lipo te prosin črn si mi kod kotal

Va mozgu ni boba talinta

A va telu si gobasta brinta

 

Tr ovakov i nisi za med ljude

Ljeh jedino za čučat na petru pod konjići

Krsti se divane već jedanput

Ma ljudi komu ja to divanin

Neće jadno nego ča j navadno

 

Moreš tr moreš i dalje z nosun zavijat

Zgljedaš ko da si na ose cural

A ritišće ti kod na strašilu visi

Z duplin se kračunun zaklopi va trapu

Kadi j škuro kod i v riti da te svit ne vidi

 

Krivogljedino zvrć ću ti te oćale

Ča si jih nabandal na glavinu

Pa ću ti je zarinut va gubičinu

I da mi više riči nisi rekal a kamo ča napisal

Zapameti zavavik smo finili

 

 

Manje poznate riječi:

 

ljelje – eno, gle, glegle;

ov lih – ovaj časak;

kvačak – zgrbljeno i smanjeno staračko tijelo;

spištat – nabiti, sabiti;

ucvirak – čvarak;

njokat – mijaukati;

sogan – nevaljalac, čovjek pokvarena značaja;

hitit – uvrći;

baštat – pristajati;

fićfirić – gizdelin;

škrbetat i prketat – puno govoriti, ali više nesmisleno nego zdravorazumski i povezano;

kljepetat – skitati, pohađati okolo na okolo;

trhljinav – truo, nezdrav;

finjivat – u ovom značenju ne dati nekome mira;

vas – cijeli,

svit – svijet, narod;

pocurančina – popišanac;

cur – mokraća;

mokroticun mokar – potpuno mokar;

fuljetača – nemoralna osoba sklona skitnji;

ropoćina – starina, podrtina;

smirun – zauvijek;

bob – mrva;

talint – talent, pamet;

gobast – grbav;

brinta – bačvica zapremine 10-20 litara, nosi se uprćena na leđima;

tr – pa;

petar – tavan;

konjić – rožnik na krovištu;

divan – divljak;

curat – mokriti;

ritišće – stražnji dio hlača;

kračun – zasun;

krivogljedina – razroko ili uopće slabovidno čeljade;

zvrć – skinuti, zbaciti;

nabandat – neskladno namjestiti;

zarinut – ugurati;

finit – završiti.